Petrit Ruka per shkrimin tim "Petrit Ruka vajton Dilinë"

Petrit Ruka   për shkrimin tim....Petrit Ruka vajton Dilinë

I dashur Timo, (Mërkuri)

e lexova me një frymë shkrimin tënd "Petriti Ruka vajton Dilinë" dhe u dalldisa prej gëzimit. E them me zemër në dorë, se më shumë se sa përkëdheljet ndaj meje, (që po se po më mbushin plot kënaqësi njerëzore e krenari poetike se paskam krijuar diçka kaq të mirë) akoma më tej më gëzon bindja tani e palëkundur, se në këtë fushë, atë të studimeve dhe përsiatjeve mbi folklorin shqiptar, tani Timo Mërkuri është ndër njohësit dhe studiuesit më të mirë të kësaj hullie fatkeqësisht të anashkaluar, duke injoruar mbase pasurinë më të madhe kombëtare që kemi. E kam lexuar me një frymë librin tënd të mrekullueshëm "Në bedenat e iso polifonisë" dhe nuk kam pikë droje ta them se pas librit "Autobiografia e popullit në vargje" të Ismail Kadaresë nuk kam ndeshur një libër tjetër që të sjellë kaq shumë njohuri, gjykim profesional, emocion dhe krenari për folklorin tonë. Besoj me gjithë shpirt se tërë jetën kam pasur një dhembshuri të skajshme ndaj këngës popullore. E po kështu bindjen se jemi të bekuar prej kësaj pasurie. Por po kaq shumë të madhe kam pasur brengën që kurrë nuk munda të ulem e të shkruaj në këtë fushë, ku do të doja me gjithë shpirt të kontribuoja sado pak. Ta kam zili, shumë zili. Dhe atë pak "inat" që më kap në çastin e parë, ma rrafshon e ma përmbyt një mirënjohje e pafund që dikush, shumë herë më i zoti se sa unë e bën këtë gjë mrekullisht.Një ditë (besoj me gjithë shpirt tek kjo bindje,) këto lloj librash do të jenë thesare me një çmim të florinjtë në kulturën e këtij vendi. Por më kot po ngatërrohem me këtë gjë.
Thjesht dua të të përqafoj për të thënë atë faleminderit që kjo fjalë (thjesht e shkruar) nuk e mbart dot!

Yti,
Petrit Ruka

15.01.2019

Ilirian Zhupa : Një shkrim që të lë pa frymë, shkrimi i Timos, për poezinë tënde për Dilinê... Kënaqësi t'u lexosh të dyve Petrit i dashur!

Ndue Lazri E lexova me shume kenaqesi kete shkrim te Timos. Perveç ndjeshmerise se larte, shkrimi eshte edhe shprehje e nje njohje te mire te folklorit, te kenges popullore, por edhe te poezise nga autori. Shkrimi te ben ta perjetosh dyfish poezine tende-vajtim per Diline. Urime Timos per kete shkrim por edhe ty, vellaçko, per perlat poetike me te cilat na kenaq shpirtin.

Mare nga fb